Keantem Ombak, Comprenge Klenger

ngapakpos — Thu, 30 Oct 2008 06:32:12 +0000

Pirang-pirang compreng sing pada dikencang nang Dermaga Wijayapura Nusakambangan, Cilacap, Jateng, rusak keantem ombak dhuwur sing ngliwati pesisir Cilacap. Rebo (29/10/2008). Tekan siki compreng-compreng kuwe dijoraken bae jerene arep urus ngenteni banyu segara surut.

Kemang (45), sing nduwe kapal kang rusak, warga Desa Tambakreja, Kecamatan Cilacap Selatan, ngomong ombak dhuwur kuwe teka antarane jam 07.00 WIB.

“Biasane be compreng tak taleni nang tambatan ora apa-apa. Mung esuk kiye ana ombak dhuwur dadi kapale inyong rusak,” jarene.

Miturut dheweke, comprenge siki ora bisa dienggo. Biasane, Kemang ngangkuti petugas lembaga pemasyarakatan lan warga sing arep pada tilik keluargane nang Pulau Penjara kuwe.

“Per wong mbayare Rp 5 ewu. Nek agi rame sedina bisa ulih Rp 500 ewu, nek sepi ulih Rp 300 ewu,” tambah Kemang.

Seliyane comprenge Kemang, compreng nduweke Juhari, warga Desa Tambakreja, Kecamatan Cilacap Selatan, uga rusak nang wektu sing bebarengan.

Juru Kir Kahanan nang Stasiun Meteorologi Cilacap, Teguh Wardoyo, mbenerake anane ombang dhuwur sing ngantem pesisir Cilacap. Jerene, siki kabeh pelayaran mbebayani banget, bisa-bisa kerem.

“Ombak nang segara 3,5 meter, nang pesisir 2-3 meter. Bantere angin nang pesisir 22-45 kilometer per jam lan nang segara amba bisa tekan 30-50 kilometer per jam. Jan bahaya banget,” jerene. (Yossy Suparyo)

Ngapak Pos

Keantem Ombak, Comprenge Klenger